全世界最關心我生日，送最多生日禮物嘅
就係呢堆不明號碼短訊同垃圾郵件發送人。
如果你覺得好寂寞，無人記得你生日
不妨多登記幾個會藉，多周圍亂填個人資料
然後到你生日月份每日都可以收到好多祝福
有啲仲有「禮物」送㖭。人間有愛。
/
關於生日想講多少少廢話。
以前覺得自己生日好大件事
會連續幾日同唔同朋友慶祝（anti-social前我好多朋友）
中學時期仲會好執著人哋有無同自己講生日快樂
非常中二病地覺得當日全世界spot-light都要照住我
曾經我都係一個attention-seeker哈哈。
但隨住個人愈嚟愈孤癖，朋友愈嚟愈少
中二病痊癒後，發現全世界spot-light自己handle唔到
仲會尷尬癌發作（我覺得史上最尷尬moment係唱生日歌）
我依然將生日睇得好重要，但只係對於自己嘅重要
我再無用生日去衡量其他人同我嘅關心
去計算別人對自己嘅真情假意，夠唔夠關注。
生日嘅意義對我嚟講係每一年嘅check-point
幫我檢視過去一年嘅自己，同定立大一歲目標
仲有畀藉口自己威脅麥仔畀我做女皇（一日）。
依家最令我忐忑並唔係12點收到幾多生日快樂
而係每年生日前幾日都忍唔住回顧過去一年
同埋對於年齡個位數字不斷上升嘅恐懼。
P.S 未生日，唔使祝。
IG：@hkgirlfriend
FB：港女友
Search